1: Wednesday, December 12, 2012 - 16:32:25
2: 31 Jeer.

Wasiirka Howlaha guud oo maanta xafiiskiisa ku qaabilay wakiilka ururka Jaamacadda Carabta u fadhiya Soomaaliya

Waxaa Qoray:

Wasiirka Howlaha guud Gaadiidka Badda iyo Dekedaha Muxudiin Maxamuud Kaalmooy ayaa maanta xafiiskiisa ku qaabilay wakiilka ururka jaamacadda Carabta u fadhiya magaalada Muqdisho Amabassador Al-Sayid Maxamed Cabdalla Idiris.

Qaabilaadaasi oo ka dhacday xarunta Wasaaradda Howlaha guud Gaadiidka Badda iyo Dekedaha ayaa waxaa kaloo ka qeyb galay Agaasimaha guud ee Wasaaradaas Maxamed Cusmaan Cali Dhagaxtuur iyo Agaasimayaasha waaxyaha kala duwan ee Wasaaradaas.
Kulanka oo ay isku dhaafsadeen arrimo badan oo la xariiray iskaashiga iyo wax wada qabsiga ka dhaxeeya ururka Jaamacadda Carabta iyo Dowladda Soomaaliya oo qeyb ka ah ururkaas.

Shir jaraa’id oo ay si wadajir ah u qabteen markii uu soo gabagaboobay kulankaas ayaa waxaa ugu horeyn Saxaafadda si wadajir ah ula hadlay Wasiirka Wasaaradaas Md. Kaalmooy iyo wakiilka ururka Jaamacadda Carabta u fadhiya Al-Sayid Idiris.

Wakiilka oo hadlay ayaa ka warbixiyay booqashada uu ku yimid Wasaaradda iyo kulanka uu la qaatay mas’uuliyiinta, wuxuuna sheegay inuu soo gaarsiiyay hambalyo iyo bogaadin uu ka siday Xoghayaha guud ee Jaamacadda Carabta iyo dalalka ku bahoobay ururkaas.

Ambassadorku wuxuu sheegay in ururka Jaamacadda Carabta uu si weyn u soo dhoweynaayo una garab taagan yahay Dowladda cusub ee uu horseedka ka yahay Xasan Sheekh Maxamuud iyo xukuumadda tirada yar ee uu magacaabay Ra’iisal Wasaare Saacid, iyadoo taas laga doodaayana ay maanta ku soo beegantay inuu soo gaarsiiyo hambalyadaan qaaliga ah ee iyo taageerada uu ururku jaamacadda u hayo Dowladda Soomaaliya, wuxuuna hoosta ka xariiqay in ururka Jaamacadda Carabta uu ka qeyb qaadanaayo dib u dhiska dalka Soomaaliya iyo sidii taageero maadi ah loo soo gaarsiin lahaa shacabka Soomaaliyeed, wasaaradda uu maanta booqday ay tahay Wasaarad howsheedu tahay dib u dhiska dalka Soomaaliya.

Wasiirka Howlaha guud oo isna si gaar ah uga hadlaayay kulanka uu maanta la qaatay wakiilka ururka Jaamacadda Carabta ee Soomaaliya ayaa wuxuu sheegay inuu soo dhoweynaayo dadaalka jaamacadda Carabta ee ku wajahan dib u dhiska dalka Soomaaliya oo sida laga warqabo 22-sano ay ku burbureen kaabayaashii dhaqaale ee uu dalku iska lahaa, wuxuuna sheegay in Wasaaradda Howlaha guud ay dejisay qorshe ay wax kula wadaageyso dalalka ku jira ururka Jaamacadda Carabta gaar ahaan Wasaaradaha ku shaqada leh dib u dhiska dalka.

Waxa uu sheegay Wasiirku in dowladda Soomaaliya ay dejisay qorshe asal u ah amniga, siyaasadda iyo dib u dhiska, wuxuuna hoosta ka xariiqay in booqashada wakiilka ay ku soo beegantay iyadoo dhowaan wasiirada dib u dhiska dalalka jaamacadda Carabta ay kulan xasaasi ah ku yeelanayaan magaalada Baqdaad ee dalka Ciraaq kaasoo dhici doona inta u dhaxeya 18-ka ilaa 20-ka bishaan, wuxuuna xusay in dowladda Soomaaliyeed isagoo ka wakiil ah uu kulankaas hordhigi doono mashaariic ku saabsan dib u dhiska dalka Soomaaliya si ay gacan uga geystaan wadamada Wasiiradooda ay halkaasi ku shirayaan dib u dhiska dalka Soomaaliya.

FAKARKAAGA DHIIBO ADIGOO ISTICMAALAYA FACEBOOK, YAHOO, HOTMAIL AMA AOL

KU LAABO BOGGA HORE OO RIIX HALKAN

BOGGA CIYAARAHA KALIYA RIIX HALKAN

LIKE DHEH SI AAD U HESHO AQBAARO DHEERI AH¨

Comments are closed

¨
















Log in | Designed by Jimcale