1: Wednesday, December 12, 2012 - 13:23:49
2: 355 Jeer.

Wadanka Sacuudiga oo 30-kii daqiiqaba uu furiin dhaco (Warbixin)

Waxaa Qoray:


Furiinka & bururka qoysaska ayaa ka noqdey wadanka Sacuudiga tusbax afka laga furay, iyadoo warbixin cusub oo ka soo baxday hay’addaha sharciga ee dalkaasi ay xaqiijiyeen in 30-dii daqiiba uu dhaco furiin, taasi oo ka dhigaysaa wadankaasi halka ugu furiinka badan dunida.

Sanadkii 2010-kii waxaa la sheegay in ay ka dhaceen dalkaasi 18,765 (Sideed iyo toban kun todobo boqol lixdan iyo shan) kiis oo furiin, laakiin wixii mudadaasi ka dambeeyey waxaa kor u sii kacay furiinka 35%.

“Tani waxay ka badan tahay heerka caalamiga ah 18 ilaa 22%, waxaana hadda ogaanay in 40% ay kordheen dacwadaha la xiriirka furiinka” ayuu yiri Sheikh Saeed Al Yousuf, oo madax u ah maxkamadaha magaalada Tabuk ee dhacda waqooyiga Bari ee dalkaasi Boqortooyada Sacuudi Carabiya.

Laamaha garsoorka wadanku waxay dhaliisha kororka furiinka u dusha saareen guurka qarsoodiga ah ama qudbo sireedka oo si xawli ah wadankaasi uga oogan, iyadoo marka haweenaydu ogaato in ninkeedu uu naag kale la guursadey ay horey ka dalbato furiin ama in Ninku uu furo xaaska cusub, inkastoo diinta Islaamka ay u baneysay Ragga Muslimiinta ah inay guursan karaan afar xaas hadii ay ka bixi karaan xuquuqda qoys ee xaasaska.

Mohammed Al Atiq, oo ah qabiir ku xeeldheer arimaha bulshada ayaa u sheegay Telefishinka Alarabiya news network, in kororkan xadka ka baxsan ee furiinka uu yahay fariin deg deg ah oo u baahan in wax laga qabto.

“Hadii aan la helin hanaan lagu xakameeyo furiinkan tirada badan, waxaa imaan karo dhibaatooyin kala duwan oo bulshada soo gaari doona” ayuu yiri Mohammed Al Atiq.

“Qudbo sireedu ayaa ah tan ugu dhibkan horeseedaysa, maxaa yeelay marka haweenayda weyn (ninku horey u qabey) ay ogaato in ninkeedu uu naag guursadey iyadoo la isku ogolaaday hab qarsoodi ah, waxay keenaysaa in uu furo xaaska dambe (tan cusub) ama tii hore, taasi oo kordhisay furiinka, waxaase ugu badan xaaska cusub oo si fudud loo furayo, iyadoo shuruudaha ay ka mid tahay in hadii la isku ogaado iyadu ay banaanka u baxayso oo aanay heleyn xuquuqaha guurka qaarkood, guurkaasi oo loo aqoonsadey mid ku meel gaar” ayuu yiri Sheikh Mohammed Al Falaj, oo ah la taliye arimaha qoyska.

Laamaha garsoorku waxay xaqiijiyeeen in dhamaan furiimada dhacay mudooyinkii ugu dambeeyey 80% ay yihiin guurka Qudbo sireedka, iyadoo inta badan haweenka lagu guursado guurkaasi ayaa inta badan ogol in raggu ay guryahooda kale u hoydaan, isla markaana xuquuqda haweenyeda kale ay wadan ka yar tahay.

Waxaa Qoray
Mowliid Xaaji Cabdi

FAKARKAAGA DHIIBO ADIGOO ISTICMAALAYA FACEBOOK, YAHOO, HOTMAIL AMA AOL

KU LAABO BOGGA HORE OO RIIX HALKAN

BOGGA CIYAARAHA KALIYA RIIX HALKAN

LIKE DHEH SI AAD U HESHO AQBAARO DHEERI AH¨

Comments are closed

¨
















Log in | Designed by Jimcale