1: Tuesday, December 4, 2012 - 16:56:36
2: 242 Jeer.

Waa lagu karaama Beelay K/Cagta Soomaaliya !!

Waxaa Qoray:


Isboortigu oo ah fan hiwaayadeed lagu kasbado magac, maal iyo sharaf ayaa ah mid kaliya ee abuura isdhaxgal bulshada kala dagaalama caadooyinka xun xun, waana midka qura oo ay wada xiiseeyaan da’kasta oo ay bulshada ka kooban tahay, hadii ay ahaan laheed caruur ama ciroolaha caalamka,iyadoo bahda ku mataaneysan isboortiga lagu yaqaano xamaasad, qiiro iyo wadaninimo ay kaga caafimaad qabaan arimaha kala geeya umada dunida qaarkood sida qabiilka, eexda, nin jecleysiga IWM.

Taariikh ahaan Soomaaliya waxaa qeybaha kala duwan ee isboortiga laga soo cayaarayay mudo aad u fog gaar ahaan nus qarnigii ugu danbeeyay, waxaana la rumeysan yahay casrul dahabigii ugu fiicnaa ee soo maray Isboortiga soomaaliyeed inuu socday intii u dhaxeysay 1970-kii ilaa iyo horaantii sideetamaadkii, wakhtigaasi oo sida xaqiiqda ah ciyaaraha Soomaaliya ay gaareen heer lagu faani karo ilaa ay xulalka iyo naadiyada Afrika iyo kuwa Carabtuba ay ka baqan jireen marka ay isku soo aadaan xulalka ama kooxaha Soomaaliya, maadaama ay ciyaartoyda Soomaaliyeed ay xilligaasi lahaayeen xirfad aad u sareysa oo aanay u babac dhigi karin asaagoodii kale.

Shalay haddii Isboortiga Soomaaliyeed samadaasi uu lalalay, maanta waxaa isweydiin mudan halkee buu joogaa?!! jawaabta su’aashaasi aan ku koobo inaan iraahdo “Waa kaaf iyo kala dheeri’, inkastoo aan u ooyneynay wixii wanaagsanaa ee horay noo soo maray balse aan gacmaheena ku burburinay, hadana waxaa hubanti ah haddii la dadaalo in meeshii aan joogi jirnay iyo meel ka wanaagsan la gaari karo.

Laga soo bilaabo 1992-kii xilligii dib u soo nooleynta Isboortiga Soomaaliyeed ilaa iyo haatan ciyaaraheena way soo socdeen, hase yeeshee Isboortigeenu waxa uu mudadaasi ilaa iyo wakhtigaan la joogo uu soo dhex dabaalanayay taariikh xumo daba dheeraatay iyo weji gabax joogto noqday, waxaana fool xumooyinkaasi dusha nagala saaraa marka ay ciyaartoydeenu dibadaha ugu ambababaxaan ciyaaraha caalamiga ah, kuwaasi oo xulalka ama kooxaha Soomaalida ay kala soo laabtaan guul darrooyin aad u xanuun badan.

Ceebta ugu daran ee ciyaaraha Soomaaliya waxa ay wakhtigaan dhabarka u saaran tahay K/Cagta, waxaana xaqiiqo ah in mar walba ay caado noqotay in kooxaheena K/Cagta dhulka lagu jiid jiido, iyagoo daraasiin goolal ah looga soo adkaanayo mar walba oo ay safaro ciyaareed u baxaan.

Fool xumadii ugu dambeysay ee K/Cagta Soomaaliya keento waxa ay ka soo wajahday ciyaarihii bariga iyo bartamaha Afrika ee dalka Uganda, waxaana halkaasi xulkeena Qaranka kala soo gudboonaatay guul darooyin aad u murugo badan, kaddib kolkii si fudud loo dardaray wiilashii matalayay, waxaana Kampala lagala soo laabtay daraasiin goolal ah, kuwaasi oo kor u dhaafaya tobaneeyo Gool, iyadoo xulalka Burundi iyo Tanzania ay xulkeena u kala dhiibeen 5-gool iyo 7-gool, halka ay Suudaana ugu muruq sheegatay 1-0, waxaana layaab leh intii goolashaasi Soomaaliya lagu xaaqayay inay dhallinyaradeenu ka badin waayeen inay helaan hal gool oo caato ah, kaasi oo si nasiib ah ay uga dhaliyeen xulka Burundi.

Faan aan xad lahayn, ammaan xad dhaaf ah iyo xayeysiin ka badbadis ah ayaa xulka Soomaaliya la huwiyay kahor intii aanu tartan CECAFA bilaaban, waxaana hadal heyntu ahayd “Yaa hor istaagi kara xulka Soomaaliya haddii uu xulkoodu ku tababaranayo garoomada Kampala? isla markaana uu heysto macallim ajnabi ah oo uu xiriirku u qabtay iyo ereyo kale oo buunbuunin u badnaa sida in la helay ciyaartoy xulka dhanka dibadda uga timid iyo kaabayaal kale oo u badnaa ka badbadinta xulka Qaranka, balse intaasi oo idil waxa ay noqdeen bar kuma taal kaddib kolkii fooda la is daray, waxaana xulka Soomaaliya loogu barbartay sidii ciyaal bacaad oo kale.

Taageerayaasha Soomaaliya kuma cusba in xulka K/Cagta si xun looga soo adkaaday, ha yeeshee waxaa naxdin iyo murugo leh inay joogto noqdaan guul darooyinka wejiga looga soo dharbaaxayo Soomaaliya, waxaana hubanti ah nasiib darradii dhowaan xulkeena kala soo laabtay Uganda inay tahay mid niyadda ka sii dileysa bulsho weynta Isboortiga Soomaaliyeed oo iyagu horay qaati uga taagnaa in mar walba Soomaaliya lagu soo dhibco badsado.

Iyadoo aanay xumaan ahayn ayaa ciyaartoydii Soomaaliya mataleysay waxa ay u ekaayeen qaar ay macluuli dillootay, caato caatonimada ay yihiin darteed, waxaana 90-kii daqiiqo oo ay ciyaarayeen ka muuqaneysay daal fara badan, farsamo xumo, niyad jab laadad dhaadheer oo micnaheedu tahay “Kubadda iga fogee”, is faham darro, tabar darri, wada shaqeyn la’aan, kalsooni xumo iyo in iyaga xubno ka mid ah ay garoonka iska dhex taagtaagnaayeen kaddib kolkii uu wadnaha afka u soo galay isla markaana ay xamili waayeen awooda jireed ee ciyaartoydii ka soo horjeeday.

Daawadayaal aad u fara badan ayaa madax xanuun ka qaaday guul darrooyinkii is xig xigay ee Soomaaliya ka soo food saaray magaalada Kampala, waxaana haatan goobaha ay ku kulmaan bah weynta Isboortiga ka socota doodo ku aadan in wax la iska weydiiyo goolashii aan xadka lahayn ee Soomaaliya laga soo laqsiiyay ciyaarihii bariga iyo bartamaha Afrika, iyadoo isweydiintu ay u badan tahay eeda guul darrooyinkaasi ma ciyaartoydaa iska leh, mise xiriirka Soomaaliyeed ee K/cagta, mise meel kale ayay sartu ka qurunsan tahay.

Nabar aad fileysay naxdin ma leh, sidaasi daraadeed waa iska cadeyd in xulka Soomaaliya lagu soo durdurin doono, maxaa yeelay xul aan heysan nolol, dawo, qalab, hoy lagu xareeyo, mushaar, macallimiin fiican, isla markaana lagu soo xulo nidaam u dhow habka ay Soomaalidu wax ku qeybsato ee loo yaqaano 4.5, way adag tahay in wax natiijo ah laga sugo.

Horay ayaa mar wax looga weydiiyay walaalaha jufada Sacad ee beesha H/Gidir oo hoggaamiya Xiriirka K/Cagta kalana ah Guddoomiye Cali Saciid Guuleed iyo Xoghaye Guud C/Qani Saciid Carab waxaa laga soo xigtay in ujeedka Soomaaliya uu ku eg yahay ka qeyb gal oo qura, balse aan wax guul ah laga sugeynin si ay madaxda Xiriirka ugu fududaato ka qeyb qaadashada shirarka CECAFA, CAF iyo kan FIFA, isla markaana ay u ilaashadaan dhaqaalaha lagu bixiyo magaca K/Cagta, iyo xubinimada ururradaasi oo la weyn karo haddii aan laga qeyb gelin ciyaaraha caalamiga ah.

Sida xaqiiqda ah sidaan si ma ahan ee armay haboon tahay in la is daba qabto, waxaana shaki ku jirin in karaamo beel weyn Kampala lagala soo noqday mar haddii xulkeena saddexdii kulan ee uu ciyaarayay laba ka mid ah laga dhaliyay ilaa iyo 12-gool ku dhan, taasi oo ku tuseysa halka hoose oo ay K/Cagta Soomaaliya mareyso ee Allow K/Cagta waa ku karaama beelnaye kuwa kale kor noogu qaad!.

Waxaa Qoray:
jabriil Maxamuud Nuur (Jabra)
jabriil37@hotmail.com

FAKARKAAGA DHIIBO ADIGOO ISTICMAALAYA FACEBOOK, YAHOO, HOTMAIL AMA AOL

KU LAABO BOGGA HORE OO RIIX HALKAN

BOGGA CIYAARAHA KALIYA RIIX HALKAN

LIKE DHEH SI AAD U HESHO AQBAARO DHEERI AH¨

Comments are closed
















Log in | Designed by Jimcale