MUQDISHO:-Ciidamadii cusbaa ee dhowaan dowladda ka soo saartay xeryaheeda ciidamada ayaa saaka la arkayay iyagoo isaga soo baxaya aagaga dagaalka ee maalmihii u dambeeyay ay ku xoojisay, waxaana ciidamadan oo raxan raxan u socda ay sii galayeen Madaxtooyada Villa Soomaaliya.

Dhaq dhaqaaqyada ciidan iyo dhoolatuska milateri ee ay wadaan ciidamadan ayaa ahaa kuwo maalmihii la soo dhaafay si weyn looga dareemay caasimada, waxaana soo baxaya warar kala duwan oo ku aadan qaabka ay uga soo baxeen.

Ciidamadan iyo saraakiisha hogaamineysa oo ah kuwo qibrad leh ayay wararku sheegayaan in ay ka horyimaadeen qorshe ay wateen saraakiil caan ah oo ka soo jeeda waqooyiga Muqdisho, kuwaasoo damacsanaa in ay dagaalka ay ka qeyb qaateen maleeshiyo beeleedyo.

Wararka qaar ayaa sheegaya in maleeshiyo beeleedyada waqooyiga ka soo jeeda ay shuruud ku xireen in ay ka baxaan aagaga, iyagoo dalbaday lacago mushaaraad ah oo muddo aan la siin iyo kaalintii ay ka qaateen difaaca deegaanadaas.

Maleeshiyaadkan ayaa shalay qaar ka mid ah lagu guuleystay in laga soo saaro aagaga, halka qaarkoodna wali ku adkeysanayaan, waxaana la ogeyn go'aanka kama dambeysta ah ee ay qaadan doonaan saraakiisha hogaamineysa Ciidamada.

Saraakiisha ciidamada ayaa sheegaya in hadii maleeshiyaadkan laga saari waayay aagaga uu fashil ku imaan karo qorshaha dagaal ee wado dowladda, waxaana socda wada hadalo la doonayo in maleeshiyaadka lagaga soo saaro aagaga, si loogu badalo ciidamada cusub ee dowladda soo tababartay.

Warar lagu kalsoonaan karo ayaa sheegaya in maleeshiyaadkan ay dooneyso dowladda soomaaliya in ay qarameyso, isla markaana ay ku xareyso xerooyin si tababar loogu qaado.

Soomaalidamaanta
Muqdisho