1: Thursday, December 13, 2012 - 15:32:51
2: 563 Jeer.

Hadaad dalxiis dooneyso soo daawo xeebta Liido!!

Waxaa Qoray:

xeebta liido 1
Dalxiiska oo ah il dhaqaale aad u fara badan laga heli karo ayaa dunida badankeed waxa ay siisaa tixgelin aan la qiyaasi karin, maxaa yeelay dalxiisku waa mid safka hore kaga jira goobaha laga maasho lacagaha malaayiinta Dollar gaareysa ee lagu horumariyo nolosha bani’aadamka ku dhaqan dunidaan guudkeeda.

Wadamada caalamka si aad ah ayay ugu kala horeeyaan qeybaha uu ka kooban yahay dalxiiska, waxaana jira wadamo si aad ah looga dambeeyo dalxiiska iyo arrimihiisa, kuwaasi oo isugu jira wadamada ku horumaray dhinaca ugaadha duur joogta ah oo ay u soo dalxiis tagaan malaayiin dad ah iyo kuwo meel sare ka gaaray dhanka keymaha oo iyana si aan la qiyaasi karin ay u xiiseeyaan sidii mar uun ay u soo dhex istaagaan keymaha dunida caanka ka noqday, halka wadamo kalena macruuf ku yihiin buuraha daawashadooda la jecel yahay iyo durdurrada dabiiciga ah oo dalalka adduunka qaarkood si weyn looga yaqaano.

Soomaaliya oo xilligii bari-samaadka lahayd goobo kala duwan oo loo soo dalxiis tago sida Ugaadha naadirka ah ama dhif dhifka ku ah adduunka, keymaha cagaarka badan, buuraha la jecel yahay, xeebaha aan dabaashooda laga dhergeynin iyo cimilada hodonka ah ee aan adduunka badankiis laga wada helin ayaa waxaa u xilsaarnaa ilaalinta iyo horumarinta kheyraadkaas dabiiciga hay’ad ama Wasaarad u gaar ah, taasi oo dalka soo gelin jirtay kumanaan Dollar oo ka imaan jiray boqolaalkii dalxiisayaalka ahaa ee Soomaaliya sanad walba u soo dalxiis tegi jiray.

Inkastoo Soomaaliya uu dalxiisku u ahaa il dhaqaale fara badan ka soo geli jiray intuu doonaba ha la’ekaadee ayaa haatan nasiib darro waxaa burbur lixaad leh ku yimid goobihii dalxiiska ku wacnaa, waxaana xirmay meelihii loo dalxiis tegi jiray dagaalada sokeeye awgeed, ha yeeshee muddo sanado ah kaddib waxaa muuqaneysa inay Soomaaliya ka soo kabaneyso arrimahaasi, iyadoo ay jiraan goobo kooban oo xilligaan loo dalxiis tegi karo isla markaana lagu tamashleyn karo.

In ka badan oo ka mid ah bulsha weynta Soomaaliyeed haba ugu badnaadaane dadka dibadaha ka imaanaya waxa ay si aan la qiyaasi karin ugu dalxiis tagaan xeebaha dhaca labada cirif ee magaalada Muqdisho, kuwaasi oo kala ah: Xeebta Liido iyo tan Jaziira, kuwaasi oo haatan u muuqda inay bilow fiican u yihiin dib u soo nooleynta goobihii dalxiiska lagu yaqiinay oo ay Soomaaliya lahayd xilligii dagaalada sokeeye kahor.

Xeebta Liido oo ah goob ay daawashadeeda iyo ku raaxeysigeeduba ay aad u wada jecel yihiin da’ kasta oo Soomaaliyeed ayaa hal sano iyo dhowr bilood kahor waxa ay ahayd meel aan la tegi karin, maxaa yeelay waxaa gacanta ku hayay maleeshiyaadka kooxda Al-Shabaab, kuwaa oo xeebta Liido ka dhigay goob dagaal, kaddib kolkii ay agagaaraha xeebtaasi ka sameysteen dhufeysyo ay ku gambadaan.

Waa Alle mahadii in maanta sidii la doono loogu tamashleyn karo xeebta Liido, waxaana wax lagu farxo ah sida ay maalin walba gaar ahaan maalinta Jimcaha ah ee ugu dabaal tagaan xeebtaasi boqolaal iyo boqolaal ka mid ah shacbiga Soomaaliyeed ee ku dhaqan magaalada Muqdisho iyo nawaaxigeeda, waxaana ishaada soo jiidanaya sida ay xeebtaasi mashquulka u tahay maalinta Jimcaha ah, iyadoo aan la isu kala saarsaareyn kani waa fulaan, kaasi waa qansax, kanina waa gob iwm, taasi oo muujineysa in LIIDO la wada leeyahay mar haddii loo wada siman yahay.

Marka ay kuu suuragasho inaad booqato xeebtaasi waxaa ku soo jiidanaya baararka ka furan iyo kuwa hadda laga hirgelinayo halkaasi iyo dadka loo qaateenka ah ee u soo nasashada taga xeebtaasi iyo baararkeeda, waxaana hal xiraale kugu noqonaya sida ay isu dhex gelayaan isla markaana ay u wada sheekeysanayaan dadka ku kulmaya goobahaasi, kuwaasi oo isugu jira dad bannaanka dalka ka yimid iyo kuwo horay ugu sugnaa G/Banaadir, waxaana hubanti ah qof walba oo gaara xeebtaasi Liido inuu kala kulmayo jawi degan oo leh farxad iyo tamashle uu raalli ka noqon karo.

Waa u qalantaa in degaanka xeebta Liido lagu ammaano isbedelka loo riyaaqo ee ay durbaba la timid, ha yeeshee waxa ay u baahan tahay ku sii darid iyo sidii looga ilaalin lahaa wax walba oo wax u dhimi kara ishaasi birqeysa, waxaana wanaagsan in la isu kaashado sidii horumarin dhinac kasta ah loogu sameyn lahaa goobtaasi oo xilligaan u eg inay tahay meel lagaga bogsan karo dhibaatooyinkii dalkaan soo maray, isla markaana ah goob ay Soomaaliya kula tartami karto meelaha dunida ugu fiican ee sida aadka ah loo jecel yahay.

Wax walba oo wacan waxay leeyihiin iin ama cillad, sidaasi daraadeed haddii ay Liido noqon lahayd Luulkii Soomaaliya waxaa dhaliil ugu filan gabdhaha aan asturneyn ee xeebtaasi loo dabaal geeyo iyo baararka kooban ee ku yaala xeebtaasi iyo tan Jaziira oo la sheego inay u xiran yihiin dadka wax heysta oo kaliya iyo Soomaalida dibadaha ka timid, maxaa yeelay qiimahooda oo saa’id ah dartiis.

U ooyimeyno dhismayaashii faraha badnaa iyo kuwii quruxda badnaa ee beri ku yiilay xeebta Liido, kuwaasi oo quruxdoodu ay dhexda uga jirtay fisqi iyo fasahaad, waxaase maanta loo baahan yahay iyadoo la ilaalinayo diinteena macaan iyo dhaqankeeda suuban in dadaalka ka socda xeebta Liido iyo kan Jasiira la sii horumariyo si intii la kari karo aan u soo ceshano dalxiiska ay Soomaaliya caanka ku ahayd, waxaana dadkeena la gudboon inay maal gashadaan goobahaasi si ay uga macaashaan faa’iido ka badan intii ay geliyeen.

Iyadoo muwaadin ahaan aan la dhacsanahay isbedelada nabadeed iyo horumarka lixaadka leh ee ka socda caasimada dalkeena ee magaalada Muqdisho gaar ahaan iftiinka ka baxaya xeebaha xarunteena Muqdisho ayaa waxaan dhihi lahaa Soomaalaay dadaalka bilowday iyo garashada muuqata horay u sii wada ilaa aan kaalinteenii dhinaca dalxiiska iyo dhan walbaba aan dib uga soo ceshaneyno, iyadoo aan guntii iyo gabagabadii qoraalkeygaan aan ku leeyahay “Anigu waan u bogee ruuxii dalxiis iyo tamashle doonayow soo daawo dalkeenaan la heli karin iyo xeebta Liido”.

Waxaa Qoray:-
Jabriil Maxamuud Nuur (Jabra)
E-mail: jabriil37@hotmail.com

FAKARKAAGA DHIIBO ADIGOO ISTICMAALAYA FACEBOOK, YAHOO, HOTMAIL AMA AOL

KU LAABO BOGGA HORE OO RIIX HALKAN

BOGGA CIYAARAHA KALIYA RIIX HALKAN

LIKE DHEH SI AAD U HESHO AQBAARO DHEERI AH¨

Comments are closed
















Log in | Designed by Jimcale